"Kəpəz"dən dünyasəviyyəli antirekord

Futbol üzrə milli çempionatlarda davam edən ən uzun uğursuz seriyalar açıqlanıb.

Oxu.Az xəbər verir ki, Azərbaycan Premyer Liqasının autsayderi "Kəpəz" də həmin siyahıda yer alıb.

Gəncə təmsilçisi ardıcıl 10 oyunda məğlub olub. Qərblilərin bu seriyası hələ ötən mövsümdə başlayıb.

2023/24 mövsümünü 3 məğlubiyyətlə bitirən "Kəpəz" cari çempionatın 7 matçını xalsız başa vurub. Gəncə klubu son xalını mayın 4-də "Sumqayıt"la ev görüşündə alıb - 1:1.

Bu, dünyanın ən uzun seriyaları arasında 5-cidir. Amma daha böyük uğursuzluq yaşayan 4 komanda aşağı liqa təmsilçiləridir. Yüksək liqa klubları arasında dünya antirekordu "Kəpəz"a aiddir.

Qeyd edək ki, mütləq antirekord Yunanıstanın 2-ci liqasında 23 matç uduzan "Paniliakos"a məxsusdur.