"Boşanmanın səbəbini sosial şəbəkələrdə görən insanlar mənə görə xəstədir. Bu gün insanlarımız sevib ailə qurmurlar. Yaxın keçmişə baxsaq görərik ki, SSRİ dövründə ailə institutuna görə Azərbaycan birinci yerdə dayanırdı. SSRİ dağılandan sonra bizim ailə dəyərlərimiz də dağıldı".

Bu sözləri BiG.AZ-a müsahibəsində tanınmış aparıcı - aktrisa Könül Yusifqızı bildirib. O qeyd edib ki, insalar azadlığı düzgün başa düşmürlər:

"Küçədə azadlıq qışqıran kişələr evində qorxusundan arvadından bir stəkan çay istəyə bilmir. Çünki qadın stəkanı onun təpəsinə çırpar. Biz azadlığı düzgün anlamırıq. Oğlunun 40 yaşı var, ana ondan əl çəkmir. Əl çəkin də. Qoyun cavanlar öz həyatını yaşasın, sevdiyi insanla ailə qursun. Bu qədər qohumluq olarmı? 20 il bundan öncə apardığım toylardakı gözəl üzlər bu gün yoxdur. Nə qədər qohumla evlənərlər?! Bu gün qan dəyişmir. Hətta, 3 nəsil qohum olanlar var. Valideynlərin müdaxilələri gəncləri xoşbəxt olmağa qoymur. Bir də görürsən 3 dəfə arvad boşayıb, baş kəsən kişi gedib bakirə qız alır. Niyə o qızı ona verirlər?! Ona görə ki, onun pulu var? Əgər kənar müdaxilələr olmasa, gənclərimiz xoşbəxt olar. Əgər bir qadının azad düşüncəsi olarsa və o sosial şəbəkədən də istifadə etsə də ailəsi dağılmaz. Ər, qayınana, qayınata, baldız tərəfindən əzilən qadınlar sosial şəbəkələrə gizli adlarla girib özlərindəki aqressiyanı biz məşhurların üzərinə tökürlər".

Aysel Yusifqızı